Шымкент қаласы өз дамуының әлеуметтік-экономикалық көрсеткіштерін тұрақты түрде арттыруға бағытталған нақты қадамдарды жүзеге асыруда. Қаланың дамуы тұрғындардың тұрмыс сапасын жақсарту, кәсіпкерлікті қолдау, әлеуметтік жобаларды іске асыру және инфрақұрылымды нығайту сияқты бірқатар басымдықтар арқылы қамтамасыз етіліп келеді. Шаһардағы кәсіпкерлікті дамыту бағытындағы басты жаңалық – мемлекеттік гранттық бағдарламалардың үздіксіз жүргізілуі. 2025 жылы жаңа бизнес-жобаларды жүзеге асыруға арналған үшінші лег аяқталып, 400 АЕК-ке дейінгі қайтарымсыз грант алуға 398 өтініш қабылданды. Нәтижесінде 99 азамат өз жобаларын жүзеге асыруға мүмкіндік алды. Грант иегерлері әлеуметтік санаттары бойынша әртүрлі: көпбалалы отбасылар, мүгедектігі бар балаларды тәрбиелеп отырған ата-аналар, асыраушысынан айырылған және еңбекке қабілетті тұлғалар. Грант иегерлерінің жобалары мал және құс шаруашылығынан бастап, тігін өндірісі, кондитерлік өнімдер, фаст-фуд, кофе мен қызмет көрсету салаларына дейінгі кең ауқымды бағыттарды қамтиды. 2025 жылдың қорытындысы бойынша Шымкент қаласында 432 адам қайтарымсыз грант иегері атанды. Бұл бастамалар жаңа кәсіпкерлікті дамытуға, халықты жұмыспен қамтуға және шағын бизнес инфрақұрылымын нығайтуға нақты серпін беріп отыр. Қаланың әлеуметтік инфрақұрылымын дамыту бағытындағы жұмыстар да тұрақты түрде жалғасуда. Соңғы жаңалықтарға сәйкес, Тассай шағынауданының тұрғындарына табиғи газ жеткізу жобасының екінші кезеңі аяқталып, 1 700 абонент көгілдір отынға қосылды. Бірінші кезеңде 800 үй газға қосылған болатын, ал жыл соңына дейін қалған үйлер де орталық жүйеге қосылмақ. Жобаның толық жүзеге асуы нәтижесінде 3 345 абонент табиғи газға қол жеткізеді. Жаңа тартылған газ құбырының ұзындығы шамамен 70 шақырымды құрайды, бұл тұрғындардың өмір сапасын арттыруға, тұрғын үй инфрақұрылымын жаңартуға және экологиялық тұрақтылықты қамтамасыз етуге бағытталған маңызды қадам болып отыр. Шымкент қаласы әкімдігінің орынбасары Сәрсен Құранбек қаладағы осындай бастамалардың тұрғындар мен бизнеске қолдау көрсетуді қамтамасыз ететінін, әлеуметтік және экономикалық жобалардың үйлесімді жүзеге асуы қаланың дамуы мен халықтың әл-ауқатының өсуіне нақты үлес қосатынын атап өтті.
Әлемге көзқарасыңды өзгертетін Janalyqtar!
