Бүгін Шымкент қаласындағы Абай саябағында қалалық Славян этномәдени бірлестігінің ұйымдастыруымен «Ескі күйтабақ» («Старая пластинка») атты ретро-фестиваль өтті.
Музыкалық кештің басты мақсаты – өткен ғасырдың танымал әндерін жаңғырту, аға буынның жүрегіне жақын әуендерді қайта шырқап, ұрпақтар сабақтастығын өнер арқылы дәріптеу. Ашық аспан астында өткен фестиваль қала тұрғындарына көтеріңкі көңіл күй сыйлап, әр кезеңнің музыкалық мұрасын бір арнаға тоғыстырды.
Іс-шараға қалалық Славян этномәдени бірлестігінің төрағасы Наталья Сергеевна, қала тұрғындары мен этнос жастары қатысты. Концерттік бағдарлама барысында қазақ, орыс, беларусь және итальян тілдеріндегі танымал әндер орындалып, көрермендерге ерекше әсер сыйлады. Барлығы 35 музыкалық нөмір ұсынылып, сахнада жеке орындаушылармен қатар вокалдық топтар мен шығармашылық ұжымдар да өнер көрсетті.
«“Ескі күйтабақ” – біз үшін жай ғана концерт емес, жүрекке жақын естеліктерді жаңғыртып, адамдарды ән арқылы табыстыратын ерекше мәдени кездесу. Әннің ғұмыры ұзақ болады: бір әуен тұтас бір дәуірді еске түсірсе, енді бірі адамның жастық шағын, алғашқы сезімдерін, қуанышты сәттерін көз алдына әкеледі. Бүгін біз әр жылдары халықтың сүйіспеншілігіне бөленген әндерді қайта шырқап, сол әуендер арқылы өткен мен бүгінді байланыстырып отырмыз. Әсіресе, әртүрлі жастағы адамдардың бір сахнада өнер көрсетіп, жастардың аға буынның музыкалық мұрасына қызығушылық танытуы қуантады. Біздің мақсатымыз – мәдени дәстүрлерді сақтау, шығармашылықты қолдау және адамдардың басын қосатын осындай игі бастамаларды жалғастыру. Бүгінгі фестивальге қатысып, қолдау білдірген барша өнерпаздарға, ұйымдастырушыларға және көрермендерге алғыс айтамын. Ән мен әуен адамдардың жүрегін жақындастырып, ортамыздағы татулық пен сыйластықты нығайта берсін!», — деді Наталья Сергеевна.
«Ескі күйтабақ» ретро-фестивалі – мәдени мұраны дәріптеп, шығармашылық байланыстарды нығайтатын және қала тұрғындарына көтеріңкі көңіл күй сыйлайтын тағылымды іс-шаралардың бірі. Осындай бастамалар Шымкенттің мәдени өмірін жандандырып, қоғамдық келісім мен өзара құрмет құндылықтарын нығайтуға үлес қосады.
